केज दि.८ – तोंडाला पांढरा गमजा बांधून अंधारात दबा धरून बसलेल्या एकास केज पोलिसांनी ८ ऑक्टोबर रोजी मध्यरात्री १२.३५ वाजेच्या सुमारास बस स्थानकाच्या बाजूस अटक केली. पोलिसांनी चौकशी केली असता त्याने सुरुवातीला उडवाउडवीची उत्तरे दिली. त्याच्याविरुद्ध पोलिसात गुन्हा दाखल झाला आहे.
केज पोलीस ठाण्याचे पोलीस नाईक जीवन करवंदे व त्यांचे सहकारी ७ ऑक्टोबर रोजी रात्री केज शहरात गस्त घालीत होते. ८ ऑक्टोबर रोजी १२.३५ वाजेच्या सुमारास बस स्थानकाच्या उजव्या बाजूस एक व्यक्ती तोंडाला पांढरा गमजा बांधून अंधारात दबा धरून गंभीर स्वरूपाचा गुन्हा करण्याच्या तयारीत होता. पोलिसांनी त्याला पकडून नाव, गाव व पत्ता विचारण्याचा प्रयत्न केला. मात्र त्याने उडवाउडवीची उत्तरे देऊन त्याला तेथे येण्याचे कारण सांगता आले नाही. पोलिसांनी कसून चौकशी केली असता त्याचे नाव जुबेर आसीफोद्दीन शेख ( वय २४, रा. ईस्माईल बाग, केज ) असल्याचे निष्पन्न झाले. पोलीस नाईक जीवन करवंदे यांच्या फिर्यादीवरून जुबेर शेख याच्याविरुद्ध केज पोलिसात गुन्हा दाखल करण्यात आला असून पोलीस नाईक राजू गुंजाळ हे पुढील तपास करत आहेत.