केज दि.२७ – ऊस भरून साखर कारखान्याकडे निघालेल्या ट्रॅक्टरच्या ट्रॉलीस दुचाकी धडकली. या अपघातात दुचाकी चालक तरुण गंभीर जखमी होऊन जागीच ठार झाल्याची घटना केज – मांजरसुंबा रस्त्यावरील मस्साजोगजवळील पेट्रोल पंपाजवळ घडली.
केज तालुक्यातील पिसेगाव येथील आकाश राजाभाऊ नेहरकर हा तरुण रविवारी रात्री दुचाकीवरून ( एम. एच. ४४ जे. ७४३५ ) मांजरसुंब्याकडून केजकडे येत होता. या रस्त्यावरील मस्साजोगजवळील देशमुख पेट्रोल पंपासमोर त्याची दुचाकी आली होती. त्याच्या समोर ऊस भरलेले ट्रॅक्टर ( एम. एच. २५ जी. २२८१ ) हे साखर कारखान्याकडे चाललेले होते. याचवेळी दुचाकीची ट्रॅक्टरच्या ट्रॉलीला जोराची धडक बसल्याने या अपघातात दुचाकीवरील आकाश राजाभाऊ नेहरकर हा तरुण गंभीर जखमी होऊन जागीच मरण पावला. या घटनेची माहिती मिळताच मस्साजोग बिटचे जमादार त्रिंबक सोपणे, पोलीस नाईक महादेव बहिरवाल यांनी घटनास्थळी धाव घेऊन पंचनामा केला.