पंढरपूर दि.७ – पुण्यामध्ये वाहतूक पोलिसाला बोनेट वर फरफटत नेल्याची घटना ताजी असतानाच पुन्हा एक धक्कादायक प्रकार घडला आहे. वाहतूक पोलिसाने टेम्पो चालकाला गाडी थांबवण्यासाठी इशारा केल्याने चालकाने गाडीच अंगावर घातल्याची क्रूर घटना आज सायंकाळी घडली. यात पोलीस नाईक सागर चौबे या वाहतूक पोलिसाचा जागेवरच मृत्यू झाला आहे. असे प्रकार वारंवार घडत असल्यांने चिंता व्यक्त केली जात आहे.
आरोपी चालक नवनाथ शिवाजी गुट्टे हा औषधांचे साहित्य आयशर टेम्पोतून (क्र.MH.04. HD. 01 70) घेऊन हैदराबादहून मुंबईकडे जात होता. यावेळी सोलापूर पुणे राष्ट्रीय महामार्गावर वरवडे येथील टोल नाक्याजवळ पोलीस नाईक सागर चौबे यांनी टेम्पो चालकाला टेम्पो थांबवण्याचा इशारा केला. मात्र, टेम्पो चालकाने वाहन थेट चौबे याच्या अंगावर घातले. यात चौबे यांचा जागीच मृत्यू झाला. अपघातानंतर आरोपीने पळून जाण्याचा प्रयत्न केला मात्र अपघात घडलेल्या ठिकाणीच उपस्थित असलेल्या वैभव गायकवाड, स्वप्नील तळेकर, गणेश गायकवाड, उमेश भोसले आदी तरुणांनी चालकाला पकडण्यास पोलिसांची मदत केली. चालक नवनाथ शिवाजी गुट्टे याला टेम्भुर्णी पोलिसांनी अटक केली आहे.
