केज दि.८ – तालुक्यातील सोनी जवळा येथे मागच्या पंधरा दिवसांपूर्वी किटकॅट डोक्यात मारून एका लाईनमन ला गंभीर जखमी केल्याची घटना ताजी असतानाच, मीटर तपासणीस आलेल्या लाईनमनला थकबाकीदाराच्या मुलाने गचुरे धरून मारहाण करीत शासकीय कामकाजात अडथळा आणल्याची घटना केज तालुक्यातील आवसगाव येथे घडली आहे. याप्रकरणी युसुफवडगाव पोलिसात गुन्हा दाखल झाला आहे.
विद्युत महावितरण कंपनीच्या बनसारोळा शाखेचे वरिष्ठ तंत्रज्ञ शिवकुमार पुष्पक फड व त्यांचे सहकारी हे आवसगाव येथे ७ डिसेंबर रोजी दुपारी पी. डी. थकबाकी तपासणीसाठी गेले होते. यावेळी संतोष रामभाऊ साखरे हा त्याच्या वडिलांच्या नावावरील थकबाकी चुकीचे असल्याचे म्हणाल्याने शिवकुमार फड यांनी तुम्ही ऑफिसला जाऊन चेक करा असे सांगितले. त्यावरून साखरे याने हे काम तुमचे आहे, मी ऑफिसला जात नसतो असे म्हणत शिवीगाळ करीत वरिष्ठ तंत्रज्ञ फड यांचे गचुरे धरून गालावर चापटाने मारहाण केली. तसेच जीवे मारण्याची धमकी देऊन शासकीय कामकाजात अडथळा आणला. वरिष्ठ तंत्रज्ञ शिवकुमार फड यांच्या फिर्यादीवरून संतोष साखरे याच्याविरुध्द युसुफवडगाव पोलिसात गुन्हा दाखल झाला आहे. फौजदार सीमाली कोळी ह्या पुढील तपास करत आहेत.
दरम्यान मागच्या पंधरा दिवसांपूर्वीच सोनी जवळा येथे दयानंद कावळे या लाईन मन च्या डोक्यात एकाने किटकॅट मारून जखमी केले होते. सदरील प्रकार वाढत जात असून याचा गांभीर्याने विचार होणे गरजेचे असून महावितरणने ही असे प्रकार वारंवार का होत आहेत ? याचाही शोध घेतला पाहिजे.