केज दि.१२ – एका सिमेंट घेऊन आलेल्या ट्रकने जीपला समोरासमोर धडक दिली. या अपघातात जीप चालकास किरकोळ मार लागला असून जीपमधील इतर प्रवाशी सुदैवाने बचावले. तर जीपचे मोठे नुकसान झाले असून हा अपघात केज शहराजवळ झाला.
जीप चालक रोहन राजाभाऊ शेरेकर ( वय २२, रा. डोंगरपिंपळा ता. अंबाजोगाई ) हे जीपमध्ये ( एम. एच. २३ एडी ०८१५ ) प्रवाशी घेऊन मांजरसुंब्याकडून केजकडे येत होते. केज – मांजरसुंबा राष्ट्रीय महामार्गावरील जॉनडिअर शोरुमसमोर केज शहराकडून सिमेंट घेऊन आलेल्या ट्रकने ( टी. एस. ०१ यूसी २६५८ ) जीपला समोरून जोराची धडक दिली. या अपघातात जीप चालक रोहन शेरेकर हे किरकोळ जखमी झाले. तर जीपमधील इतर प्रवाशी सुदैवाने बचावले. मात्र धडकेत जीपचा समोरील भाग पुर्णपणे तुटल्याने एक लाख ८० हजार रुपयाचे नुकसान झाले आहे. अपघातानंतर मदत न करता ट्रक चालक हा ट्रक जागेवर सोडुन पळुन गेला. हा अपघात ११ मार्च सकाळी १० वाजता घडला. राहुल शेरेकर यांच्या फिर्यादीवरून ट्रक चालकाविरुद्ध केज पोलिसात रात्री उशिरा गुन्हा दाखल करण्यात आला. पोलिसांनी ट्रक ताब्यात घेतला असून पोलीस नाईक रुक्मिणी पाचपिंडे ह्या पुढील तपास करत आहेत.