केज दि.२४ – अज्ञात चोरट्यांनी चालत्या ट्रकवर चढून वरील ताडपत्री फाडून ट्रकमधील ५२ हजार रुपयांच्या लेडीज गाऊनचे कार्टून लंपास केल्याची घटना केज – मांजरसुंबा रस्त्यावरील सावंतवाडी फाट्याजवळ घडली. याप्रकरणी चोरट्यांविरुद्ध केज पोलिसात गुन्हा दाखल झाला आहे.
गेवराई येथील दारलूम ( तय्यब नगर ) भागातील ट्रक चालक आणि मालक आसेफ इर्शाद सय्यद हा ट्रकमध्ये ( एम. एच. २३ एयु ७४०० ) लेडीज गाऊनचे कार्टून घेऊन २२ मार्च रोजी रात्री उशिरा मांजरसुंबा मार्गे केजकडे येत होता. २३ मार्च रोजी पहाटे ५ वाजेपुर्वी केज – मांजरसुंबा रस्त्यावर सावंतवाडी फाट्याजवळ अज्ञात चोरटे हे चालत्या ट्रकवर पाठीमागून चढले. त्यांनी ट्रकवरील ताडपत्री फाडून ट्रकमधील ५२ हजार रुपये किंमतीचे १०८ लेडीज गाऊनचे कार्टून काढून घेत पोबारा केला. ट्रक केजला आल्यावर चालक आसेफ सय्यद यांनी ट्रकची पाहणी केली असता ताडपत्री फाटल्याचे दिसून आल्याने हा प्रकार उघडकीस आला. २३ मार्च रोजी रात्री १०.४३ वाजता आसेफ सय्यद यांनी दिलेल्या फिर्यादीवरून अज्ञात चोरट्यांविरुद्ध केज पोलिसात चोरीचा गुन्हा दाखल झाला आहे. जमादार प्रभाकर नखाते हे पुढील तपास करीत आहेत.