केज दि.२५ – केज कळंब रस्त्यावर साळेगाव जवळील पुलाच्या अर्धवट व बंद पडलेल्या कामामुळे तसेच पुरेशी खबरदारी न घेतल्याने अपघात झाला असून त्यात मोटारसायकल स्वार गंभीर जखमी झाला आहे.
केज कळंब दरम्यान साळेगाव येथील पुलाचे काम निकृष्ट व जम्पिंग स्वरूपाचे झाल्यामुळे पुलावरील रस्ता उखडून त्यावर खड्डे पडले होते. वर्तमानपत्रातून या निकृष्ट रस्त्याचे वृत्त प्रकाशीत होताच रस्ता दुरुस्तीच्या नावाखाली पुन्हा रस्ता खोदून ठेवला असून त्यावर लोखंडी सळ्या अंथरून ठेवल्या आहेत. तर काम सुरू असल्याचे सूचना, दिशादर्शक फलक किंवा पुरेश्या प्रमाणात सुरक्षेची उपाययोजना न केल्यामुळे दि. २४ जून गुरुवार रोजी रात्री १० च्या दरम्यान केज कडून मोटार सायकल क्र. (एमएच-२२/डब्ल्यू-४९४४) वरून येणारे पंडित राठोड (रा. सोनपेठ जि. परभणी) हे सरळ त्या लोखंडी सळ्यावर धडकले. यात त्यांच्या डोक्याला गंभीर स्वरूपाचस मार लागला.
दरम्यान या रस्त्याने येत असलेल्या पोलीसांच्या गस्ती पथकास अपघाताची माहिती मिळताच त्यांनी तात्काळ १०८ च्या रुग्णवाहिकेशी संपर्क साधला. रुग्णवाहिका चालक मकरंद घुले यांनी तात्काळ अपघातातील जखमीस केज येथील उपजिल्हा रुग्णालयात भरती केले. उपजिल्हा रुग्णालतात वैद्यकीय अधिकारी डॉ. भिसे यांनी जखमींवर प्रथमोपचार करून पुढील उपचारासाठी अंबाजोगाई ला पाठवले.