केज दि.११ – पाठवण खोदण्यास विरोध करत चौघांनी एका शेतकरी दांपत्यास दगडाने बेदम मारहाण करून शेतकऱ्याचे डोके फोडले. ही घटना तालुक्यातील जिवाचीवाडी येथे गुरुवारी (दि.९) सकाळी १० वाजेच्या सुमारास घडली.
जिवाचीवाडी येथील अंकुश रामकिसन चौरे (३५) हे ९ सप्टेंबर रोजी सकाळी १० वाजेच्या सुमारास शेताजवळील पाठवण खोदत होते. दरम्यान, हरिभाऊ निवृत्ती चौरे, सिद्धेश्वर हरिभाऊ चौरे, ज्ञानेश्वर हरिभाऊ चौरे, उत्तरेश्वर हरिभाऊ चौरे हे चौघे तेथे आले. त्यांनी पाठवण खोदू नको असे म्हणून विरोध केला. कांद्याच्या पिकाचे नुकसान होत आहे, पाठवण खोदणार, असे म्हणताच हरिभाऊ चौरेने दगड मारून अंकुश चौरेंचे डोके फोडले, तर सिद्धेश्वर चौरेने अंकुश चौरे व त्यांच्या पत्नीस मारहाण करून मुकामार दिला. ज्ञानेश्वर चौरे व उत्तरेश्वर चौरे या दोघांनी त्यांना शिवीगाळ करून जिवे मारण्याची धमकी दिली, अशी फिर्याद अंकुश चौरेंनी दिल्यावरून चौघांविरुद्ध केज पोलिसांत गुन्हा दाखल झाला आहे. अधिक तपास पोलिस नाईक बाळू सोनवणे करत आहेत.