केज दि.२८ – पोलिसांनी छापे मारून बोरीसावरगाव व युसुफवडगाव येथून मटका घेणाऱ्या दोघांना अटक केली. त्यांच्याकडून २ हजार ६३० रुपयांच्या रक्कमेसह मटक्याचे साहित्य जप्त केले असून त्या दोघांसह दोघा बुकी मालकाविरुद्ध गुन्हा दाखल करण्यात आला आहे.
युसुफवडगाव ठाण्याचे सहाय्यक पोलीस निरीक्षक संदीप दहिफळे व त्यांच्या सहकाऱ्यांनी मंगळवारी बोरीसावरगाव येथील बसस्थानकाच्या बाजूला पत्र्याच्या शेडमध्ये सुरू असलेल्या मटका बुकीवर छापा मारला. यावेळी अनिल भानुदास मुठाळ यास मटका घेताना रंगेहाथ पकडून त्याच्याकडे असलेले मटक्याचे साहित्य व १ हजार ६०० रुपयांची रक्कम जप्त करण्यात आली. सहाय्यक फौजदार रामधन डोईफोडे यांच्या फिर्यादीवरून अनिल मुठाळ, बुकी मालक भीमराव साखरे, महादेव गायकवाड या तिघांविरुद्ध गुन्हा दाखल झाला आहे.
दुसरी कारवाईत युसुफवडगाव येथील बसस्थानक परिसरात चालत फिरत मटका घेत असलेल्या शिवाजी चंद्रकांत मुद्दे यास अटक केली. त्याच्याकडे असलेले मटक्याचे साहित्य व १ हजार ३० रुपये जप्त करण्यात आले असून जमादार रंगनाथ राठोड यांच्या फिर्यादीवरून शिवाजी मुद्दे, बुकी मालक भीमराव साखरे, महादेव गायकवाड या तिघांविरुद्ध गुन्हा दाखल झाला आहे. जमादार भगवान खेडकर, पोलीस नाईक अंगद पिंपळे हे पुढील तपास करत आहेत.
