केज दि.२६ – मागच्या काही दिवसांपासून केज तालुक्यामध्ये चंदन चोरीचे प्रकार थांबले होते. मात्र पुन्हा चंदन चोरांनी आपले डोके वर काढल्याचे दिसत असून तालुक्यातील भोपला येथून तिघांना ताब्यात घेतले आहे. त्यांच्याजवळून बारा किलो चंदनाचा गाभा जप्त केला आहे.
मागच्या काही महिन्यांपूर्वी केज तालुक्यामध्ये मोठ्या प्रमाणावर चंदन चोरी होत होती. आणि यामध्ये काही दिग्गज चंदन चोर पोलिसांनी ताब्यात घेऊन त्यांच्यावर कारवाई केली होती. मात्र हे प्रकार काहीसे थांबलेले असतानाच पुन्हा चंदन चोरांनी डोके वर काढलेले आहे. स्थानिक गुन्हे शाखेच्या पथकाला भोपला येथे चंदन चोरीचा प्रकार होत असल्याचा सुगावा लागला. आणि शनिवारी दुपारी 4 वाजता त्या ठिकाणी त्यांनी जाऊन सापळा रचला असता तिघेजण एका मोटरसायकलवर चाललेले दिसले. त्यांचा संशय आला म्हणून त्यांना थांबवले असता त्यांच्याजवळ बारा किलो चंदनाचा गाभा व चंदनाची झाडे तोडण्याचे साहित्य मिळून आले. यामध्ये दत्तात्रय नारायण तावरे, राजेंद्र किसन काळे आणि फारुख पाशा बागवान हे सर्व राहणार इंदिरा नगर कळंब यांना ताब्यात घेतले असून त्यांच्यावर कारवाई करण्यात आलेली आहे.सदरील कारवाई स्थानिक गुन्हे शाखेचे पोलीस निरीक्षक सतीश वाघ, पोलीस हवालदार मारुती कांबळे, पोलीस नाईक जायभाये, पोलीस नाईक पठाण, पोलीस अंमलदार यादव यांनी केली.
