केज दि.२१ – मागच्याच महिन्यात केज तालुक्यातील लाडेगाव येथील रहिवासी तथा गांजी येथील जिल्हा परिषदेच्या शाळेवर मुख्याध्यापक म्हणून कर्तव्यावर असलेले पांडुरंग मुळे यांचे हृदयविकाराने निधन झाले.तर वृषिकेत संगेवार यांचे कॅन्सर ने निधन झाले. आणि एक महिना लोटत नाही तोवरच पुन्हा केज तालुक्यातील जयपूरच्या जि.प.प्रा. शाळेवरील शिक्षक सुभाष चव्हाण यांचेही अकाली निधन झाल्यामुळे केज तालुका शिक्षण क्षेत्रावर शोककळा पसरली आहे.
तालुक्यातील पळसखेडा येथील रहिवासी सुभाष निळकंठराव चव्हाण(45) तालुक्यातील पैठण केंद्रांतंर्गत येणाऱ्या जयपूरच्या जिल्हा परिषद शाळेवर सहशिक्षक म्हणून कार्यरत होते. मागच्या महिन्यामध्ये लातूर येथे त्यांच्यावर मणक्याची शस्त्रक्रिया झाली होती. मात्र शस्त्रक्रिया झाल्यानंतर मणक्यामध्ये पुन्हा संसर्ग झाल्याने त्यांना पुणे येथे उपचारार्थ दाखल करण्यात आले होते. परंतु काल उपचारादरम्यान सुभाष चव्हाण यांचे अकाली निधन झाले. त्यांच्या निधनामुळे केज तालुका शिक्षण क्षेत्रावर शोककळा पसरली असून अतिशय शिस्तप्रिय आणि विद्यार्थी प्रिय असे शिक्षक म्हणून त्यांचा नावलौकिक होता. त्यांच्यावर उद्या (शनिवारी) पळसखेडा या मूळ गावी सकाळी नऊ वाजता अंत्यसंस्कार करण्यात येणार आहेत.
