केज दि.25 – मागच्या काही महिन्यांपासून केज तालुक्यामध्ये चोऱ्यांचे सत्र कमी झाले होते. मात्र मागच्या पंधरा दिवसांपूर्वी केज शहरातील शिक्षक कॉलनीतील घर भर दिवसा फोडल्याने नागरिकांमध्ये घबराटीचे वातावरण पसरले होते. आणि त्यातच पुन्हा केज तालुक्यातील माळेगाव आणि शहरातील अनेक दुकाने चोरट्यांनी लक्ष केल्याने पुन्हा नागरिक दहशतीखाली आलेले आहेत.
मागच्या काही महिन्यांपूर्वी अनेक ठिकाणी चोऱ्या झाल्या होत्या. मात्र त्यामधील काही आरोपींना जेरबंद केल्याने काही दिवस चोरीचे सत्र कमी झाली होते. परंतु मागच्या पंधरा दिवसांपूर्वी केज शहरातील शिक्षक कॉलनीत असलेले घर भर दिवसा फोडले आणि मोठ्या प्रमाणावर रोख रक्कम आणि दागिने लंपास केले. सदरील चोरीचा मागवा लागण्या अगोदरच तालुक्यातील माळेगाव येथील एक मशिनरी स्टोअर्स त्याचबरोबर सुर्डी ट्यावरील मेडिकल दुकान फोडून चोरट्यांनी हात साफ केला. आणि त्याच रात्री शहरातील तीन मेडिकल दुकानांचे शटर तोडून चोरटे नगदी रक्कम घेऊन पसार झाले. शहरातील मंगळवार पेठ मधील दोन दुकाने आणि कळंब रोडवरील एक मेडिकल दुकान चोरट्यांनी लक्ष केले. माळेगाव येथे झालेली चोरी आणि केज शहरामध्ये फोडलेले दुकान यामागे एकाच टोळीचा हात आहे की चोरटे वेगवेगळे आहेत याचा पोलीस शोध घेत आहेत. पोलिसांच्या हाती सीसीटीव्ही फुटेज लागल्याने चोरीचा शोध घेणे थोडेसे सोपे झालेले आहे. परंतु सदरील घटनेमुळे शहरातील व्यापारी बांधवांमध्ये दहशतीचे वातावरण पसरले आहे.
