मुंबई – स्थानिक नागरिकांच्या समस्या न सोडवणं एका नगरसेवकाला चांगलंच महागात पडलं आहे. समस्या न सोडवल्यामुळे नागरिकांनी नगरसेवकाला थेट गटाराच्या पाण्यात बसवल्याची घटना वाराणसीच्या बलुवाबीर मध्ये घडली आहे.
बलुवाबीर परिसरातील स्थानिक नागरीक गेल्या अनेक दिवसांपासून गटार आणि दूषित पाण्याच्या समस्येची तक्रार घेऊन नगरसेवकाकडे जात होते. मात्र सातत्याने नागरिकांच्या समस्यांनकडे दुर्लक्ष केल्यानंतर नागरिक आक्रमक झाले आणि त्यांनी हा टोकाचा निर्णय घेतला. बऱ्याच दिवसांपासून गटारातील पाणी रस्त्यावर येत असल्याने नागरिकांना त्रास होत होता. मात्र नगरसेवकाने त्यावर कोणत्याही प्रकारची उपाययोजना केली नाही. अखेर त्याच पाण्यात नगरसेवकाला एका दोरीने खुर्चीवर बांधून बसवण्यात आलं.
