केज दि.१ – घराचे कुलूप तोडून अज्ञात चोरट्यांनी घरातून दोन तोळ्याचे गंठण आणि नगदी २५ हजार रुपये असा ६५ हजार रुपयांचा ऐवज लंपास केल्याची घटना केज शहरातील वकीलवाडी भागातील शाहूनगरमध्ये घडली. याप्रकरणी अज्ञात चोरट्यांविरुद्ध केज पोलिसात गुन्हा दाखल झाला आहे.
केज शहरातील वकीलवाडी भागातील शाहूनगरमध्ये काजल मयूर अंधारे यांचे घर आहे. अंधारे यांचे कुटुंब ३० डिसेंबर रोजी घराला कुलूप लावून बाहेरगावी गेले होते. त्यानंतर त्यांच्या घरी कोणीच नसल्याची संधी साधून मध्यरात्री अज्ञात चोरट्यांनी त्यांच्या घराचे कुलूप तोडून घरात प्रवेश केला. चोरट्यांनी घराची झडती घेऊन घरातील ४० हजार रुपये किंमतीचे दोन तोळ्याचे सोन्याचे पट्टीचे गंठण आणि नगदी २५ हजार रुपयांची रक्कम असा ६५ हजार रुपयांचा ऐवज घेऊन पोबारा केला. काजल अंधारे यांच्या फिर्यादीवरून अज्ञात चोरट्यांविरुद्ध केज पोलिसात गुन्हा दाखल आहे. पोलीस निरीक्षक प्रदीप त्रिभुवन हे पुढील तपास करत आहेत.
