केज शहरात पुन्हा भरदिवसा घरफोडी, सुमारे दिड लाखांचे दागिने लंपास…….! 

           केज येथील केज-कळंब रोड लगतच्या कामगार नगर येथे पोपट नवनाथ मुळे यांचे आरसीसी घर आहे. दि. १० फेब्रुवारी, बुधवार रोजी सकाळी १० वा. पोपट मुळे हे चिंचोली माळी येथील त्यांच्या दुकानात गेले होते. तर त्यांची पत्नी ही घराला कुलूप लावून साबला या गावी गेली होती. दुपारी २ च्या दरम्यान पोपट मुळे हे केज येथे घरी आले असता त्यांना घराचे दार उघडे असल्याचे आढळून आले. तसेच कुलूप देखील तुटून पडले असल्याचे दिसले. त्यांनी घरात जाऊन पाहिले असता घरातील लोखंडी कपाटाचे लॉकर तोडून त्यातील सोन्याचे ३.५ ग्रॅमचे गंठन, प्रत्येकी ३ ग्रॅम वजनाच्या तीन अंगठ्या, १ ग्रॅम वजनाचा एक बदाम व एक अर्ध्या ग्रॅम वजनाची बाळाची अंगठी. असे एकूण साडेचार तोळे सोन्याचे दागिने आणि चांदीचे चैन व वाळे असा एकूण १ लाख ३४ हजार रु. ऐवज चोरी गेल्याचे निदर्शनास आले. घटनेची माहिती मिळताच पोलीस निरिक्षक प्रदीप त्रिभुवन यांच्या सूचनेनुसार पोलीस नाईक रुक्मिण पाचपिंडे व बाळासाहेब अहंकारे यांनी भेट दिली असून पोलीस तपास करीत आहेत.

        दरम्यान दिवसा घरफोडीचे प्रकार शहरात वारंवार होऊ लागल्याने नागिकांमध्ये दहशत पसरली असून चोरट्यांचा बंदोबस्त करण्याची मागणी होत आहे.