मुंबई दि.२३ – वन मंत्री संजय राठोड पोहरादेवी येथे येणार असल्याने त्यांच्या समर्थकांनी मोठ्या प्रमाणात तेथे गर्दी केली होती. तेथे झालेल्या गर्दीवरून सध्या सरकारवर टीका होत आहे. याच पार्श्वभूमीवर मुख्यमंत्री उद्धव ठाकरे यांनी तात्काळ कारवाईचे निर्देश दिले आहेत.
नियमबाह्य वर्तनाने आरोग्याचे नियम न पाळता गर्दी होत असेल तर संबंधितांवर जिल्हा आणि पोलीस प्रशासनाने तात्काळ कारवाई करावी असे निर्देश मुख्यमंत्री उद्धव ठाकरेंनी दिले आहेत. तसेच वाशिम जिल्हाधिकारी आणि जिल्हा पोलीस अधीक्षक यांना याचा अहवाल देण्यास सांगण्याच्या सूचना मुख्य सचिवांना दिल्या आहेत.
दरम्यान दोन दिवसांपूर्वीच मुख्यमंत्र्यांनी जनतेशी संवाद साधत सार्वजनिक कार्यक्रम, धार्मिक सण आणि उत्सव नागरिकांनी गर्दी न करता साजरे करण्याचं आवाहन केलं होतं. मात्र आज संजय राठोड पूजा चव्हाण आत्महत्या प्रकरणावर प्रथमच बोलणार असल्याने सकाळपासूनच त्यांच्या कार्यकर्त्यांनी मोठ्या प्रमाणात गर्दी केली होती. या संदर्भात गुन्हा दाखल करण्याची प्रक्रिया सुरू असल्याची माहिती सूत्रांनी दिली.
