मुंबई दि.३० – दिवसेंदिवस कोरोनाचे मीटर राज्यात वाढत चालले आहे. सरकारच्या वतीने लोकांना कोरोना नियमांचे पालन करण्याचे वारंवार सांगितल्या जात आहे.मात्र अनेक नागरिक मुंबईच्या रस्त्यांवर विनामास्क फिरतांना दिसत आहेत. अश्या बेशिस्त लोकांना मुंबई पोलिसांनी एक अजब शिक्षा दिल्याचं समोर आलं आहे. वारंवार आवाहन करून देखील नियमांचं पालन न करणाऱ्या, मास्क न घालणाऱ्या नागरिकांना मुंबई पोलिसांनी कोंबडा बनत चालण्याची शिक्षा दिली आहे.
मुंबई पोलिसांनी दिलेल्या या शिक्षेचा एक व्हिडिओ समोर आला आहे. हा व्हिडीओ सोशल मीडियावर प्रचंड व्हायरल होत आहे. अनेकांनी यावर आक्षेप नोंदवला आहे. अशा प्रकारची शिक्षा देणं योग्य नसल्याचं काही नागरिकांचं म्हणणं आहे. यानंतर मुंबई पोलिसांनी ट्विट करत यावर भाष्य केलं आहे. कोणत्याही नियमांचं उल्लंघन झालं तर त्यावर कायदेशीर कारवाई करता येते. यासंदर्भात वरिष्ठ अधिकाऱ्यांकडून चौकशी सुरू आहे आणि दोषींवर योग्य ती कारवाई केली जाईल, असं ट्विट मुंबई पोलिसांनी केलं आहे.
दरम्यान निर्बंधांचे काटेकोर पालन होत नसल्याने लॉकडाऊनबाबत नियोजन करा, असे आदेश मुख्यमंत्री उद्धव ठाकरे यांनी दिले आहेत. त्यामुळे एप्रिल महिन्याच्या पहिल्या आठवड्यात कडक लॉकडाऊन लागण्याची शक्यता आहे.
