अंबाजोगाई दि.२४ – पत्नीला घेऊन जाण्यासाठी सासरवाडीत आलेल्या जावयाला विषारी द्रव पाजून जीवे मारण्याचा प्रयत्न केला. ही घटना शहरातील शनिवारी (१९ जून) सकळी अंबाजोगाई शहरातील रविवार पेठेत घडली. याप्रकरणी तिघांवर गुन्हा नोंद करण्यात आला आहे.
जयराम हनुमंत गिरी (३५, रा. बीएसएनएल कार्यालयामागे, केज) असे जावयाचे नाव आहे. अंबाजोगाईतील रविवारपेठेत त्यांची सासरवाडी आहे. पत्नीशी त्यांचे बिनसले होते. त्यामुळे ती माहेरी आली होती. तिला घेण्यासाठी १९ रोजी जयराम गिरी हे अंबाजोगाईला आले होते. यावेळी ‘तू इथे का आला, आम्ही मुलीला तुझ्याकडे पाठविणार नाहीत’ असे म्हणत तिघांनी लाथाबुक्क्याने मारहाण केली. त्यानंतर त्यांचे दोन्ही हात घट्ट पकडून बळजबरीने विषारी द्रव तोंडात ओतले. जयराम गिरी हे उपचार घेऊन बरे झाले. त्यांच्या जवाबावरुन आप्पा माणिक गिरी (चुलत सासरा), माणिक गिरी (चुलत सासरा) व अलका गिरी (मावस सासू) यांच्यावर शहर पोलिसांत जीवे मारण्याचा प्रयत्न केला म्हणून गुन्हा नोंद करण्यात आला.
दरम्यान, गुन्हा दाखल होताच तिन्ही आरोपी फरार झाले आहेत. पोलीस उपनिरिक्षक गव्हाणे पुढील तपास करत आहेत.
