बीड दि.30 – धारूर तालुक्यातील अरणवाडी येथे अज्ञात चोरट्याने बापलेकीचे हातपाय बांधुन त्यांना मारहाण करत त्यांच्याकडील लहान मोठ्या 25 शेळ्या चोरून नेल्याची घटना मध्यरात्री अडीच ते तीन वाजण्याच्या दरम्यान घडली. त्या घटनेची माहिती शेजाऱ्याने बीड पोलीसांना दिल्यानंतर बीड पोलीसांनी धारूर पोलीसांशी संपर्क साधून घटनेची माहिती कळवली. त्यानुसार धारूर पोलीसांनी पहाटे घटनास्थळी जावून परिस्थितीची पाहणी केली. जखमी बाप आणि लेकीला धारूर येथील रूग्णालयात दाखल करण्यात आले. या घटनेने धारूर तालुक्यात एकच खळबळ उडाली आहे.
अर्जुन डोंगरे ( वय 80) व त्यांची मुलगी कौशल्या अभिमान भालेराव ( 48 वर्षे) रा. अरणवाडी हे दोघे गावाच्या जवळच राहतात. त्यांच्याकडे लहान मोठ्या 20 ते 25 शेळ्या आहेत. मध्यरात्री अडीच ते तीन वाजण्याच्या दरम्यान 4 चोरट्यांनी येवून या दोन्ही बापलेकीला मारहाण करत त्यांचे हातपाय बांधण्यात आले व त्यांच्याकडील सर्व शेळ्या एका वाहनात घालून चोरून नेल्या. सदरील घटना घडल्यानंतर बाजुला राहणाऱ्या एका व्यक्तीच्या निदर्शनास हा प्रकार आल्यानंतर त्या व्यक्तीने बीड पोलीसांशी संपर्क साधला. बीड पोलीसांनी याची माहिती धारूर पोलीसांना दिली.
दरम्यान धारूर पोलीसांनी घटनास्थळी जावून या जखमी बापलेकीला रूग्णालयात दाखल केले. या प्रकरणी अज्ञात चोरट्या विरोधात धारूर पोलीस ठाण्यामध्ये गुन्हा दाखल करण्याची प्रक्रिया सुरू होती. या घटनेने धारूर पोलीसात एकच खळबळ उडाली असून पोलीस चोरट्यांचा शोध घेत आहेत.
