बीड दि.६ – जिल्हा मध्यवर्ती सहकारी बँका, व्यापारी बँकांमार्फत शेतकऱ्यांना पीक कर्जपुरवठा करण्यात येतो. जे शेतकरी बँकाकडून घेतलेल्या कर्जाची परतफेड दि. ३० जूनपर्यंत करतात. अशा शेतक-यांना पीक कर्जाची विहित मुदतीत परतफेड करण्यासाठी व्याजामध्ये प्रोत्साहनपर सवलत देण्यासाठी डॉ. पंजाबराव देशमुख व्याज सवलत योजना राबविण्यात येते.
राज्यात एप्रिल व मे २०२१ मध्ये उद्भवलेल्या कोविड-१९ च्या परिस्थितीमुळे लागू केलेल्या टाळेबंदीच्या कालावधीत शेतकऱ्यांना शेतमालाच्या विक्री व्यवस्थेतील अडचणी आणि साखर कारखान्यांकडून शेतकऱ्यांना अद्याप देय असलेली एफआरपी विचारात घेता दि. १ जुलै, २०२१ रोजीचे शासन निर्णयाद्वारे राज्यातील जिल्हा मध्यवर्ती सहकारी बँका, व्यापारी बँकांनी शेतकऱ्यांना सन २०२० २१ या वर्षात दिलेल्या पीक कर्जाच्या वसुलीस दि. ३१ जुलै, २०२१ पर्यंत मुदतवाढ देण्यात आली आहे. वाढीव मुदतीत पीक कर्जाची परतफेड करणारे शेतकरी हे डॉ. पंजाबराव देशमुख व्याज सवलत योजनेचा लाभ मिळण्यास पात्र असतील.
दरम्यान सर्व पात्र शेतकऱ्यांनी त्यांच्या गत वर्षी घेतलेल्या पीक कर्जाची परतफेड दि.३१ जुलै, २०२१ पर्यंत संबंधित बँक शाखेमध्ये करून डॉ. पंजाबराव देशमुख व्याज सवलत योजनेचा लाभ घेणेबाबत मा. जिल्हाधिकारी, बीड श्री. रविंद्र जगताप यांनी आवाहन केले आहे.
