केज दि.१६ – एका पांढऱ्या पोत्यात चंदनाच्या ढिलप्या दुचाकीवरून घेऊन जात असलेल्या दोघांना केज पोलिसांनी पकडले. त्यांच्याकडील पाच किलो चंदन, दुचाकीसह २२ हजार ५०० रुपयांचा मुद्देमाल जप्त केला आहे.
एका दुचाकीवरून दोघे चंदनाची लाकडे घेऊन जात असल्याची गुप्त माहिती मिळल्यावरून केज पोलीस ठाण्याचे पोलीस नाईक बाळासाहेब अहंकारे, धन्यपाल लोखंडे, मतीन शेख यांच्या पथकाने १६ सप्टेंबर रोजी दुपारी केज – कानडी रस्त्यावरील तापडिया इंग्लिश स्कूलच्या समोर सदर दुचाकी पाठलाग करून अडविली. त्यांच्याजवळ असलेल्या पांढऱ्या पोत्याची झडती घेतली असता त्यात चंदनाच्या ढिलप्या आढळून आल्या. सदर चंदन चोरीबाबत त्यांना विचारणा केली असता त्यांनी उडवाउडवीची उत्तरे दिली. पथकाने रंजित निवृत्ती बचुटे ( रा. गांजी ) व ज्ञानेश्वर श्रीपती खाडे ( रा.कानडी माळी ) या दोघांना ताब्यात घेतले. त्यांच्याकडील पाच किलो चंदन व दुचाकी (एम.एच.२३ पी ०५७५) असा २२ हजार ५०० रुपयांचा मुद्देमाल जप्त केला आहे. पोलीस नाईक बाळासाहेब अहंकारे यांच्या फिर्यादीवरून रंजित बचूटे, ज्ञानेश्वर खाडे या दोघांविरुद्ध केज पोलिसात गुन्हा दाखल झाला आहे. पुढील तपास धन्यपाल लोखंडे करत आहेत.
