बीड दि.२० – अहमदनगर जवळील सुपा येथे दुचाकी दोन ट्रकच्या मधोमध चिरडल्याने भिषण अपघात झाला. यामध्ये गेवराईच्या बाप लेकासह ट्रक चा चालक व क्लिनर चा जागीच मृत्यू झाला. ही घटना आज दुपारच्या सुमारास घडली आहे. अपघातात ठार झालेले बाप -लेक हे गेवराई तालुक्यातील जातेगाव येथील आहेत. गेवराई तालुक्यातील जातेगाव येथील राजाभाऊ विष्णुपंत चव्हाण व त्यांचा मुलगा पुरुषोत्तम राजाभाऊ चव्हाण हे सुपा अहमदनगर रोडवर दुचाकीवरुन प्रवास करत होते. यावेळी रोडवर ओव्हरटेक करत असताना त्यांची मोटारसायकल दोन ट्रकच्या मध्ये चिरडली गेली. या अपघातात पिता पुत्रासह चालक व क्लिनर या चौघांचा मृत्यू झाला आहे.
घटनेची माहिती कळताच सुपा पोलिस घटनास्थळी दाखल झाले होते. यानंतर या चौघांचेही मृतदेह शवविच्छेदन करण्यासाठी पारनेर उपजिल्हा रुग्णालयात येथे नेण्यात आले असल्याची माहिती सुपा पोलिस स्टेशनचे पोलीस निरीक्षक नितीन गोकवे यांनी दिली आहे.
दरम्यान,आमदार निलेश लंके प्रतिष्ठानचे कार्यकर्ते अपघात झाल्याची माहिती मिळताच गेवराई तालुक्यातील उमापूर येथील सेनेचे युवानेते किरण आहेर यांनी निलेश लंके यांना याबाबत माहिती दिली. यानंतर आ.लंके यांनी त्यांच्या प्रतिष्ठाणच्या कार्यकर्त्यांना तात्काळ घटनास्थळी पाठवून अपघातग्रस्तांना रुग्णालयात घेऊन जाण्यापर्यंत मदत केली. मात्र चौघांचा मृत्यू झाला तर अन्य दोघां जखमींवर उपचार सुरू आहेत.
