पोटच्या मुलांकडून आईला पेट्रोल टाकून जाळण्याचा प्रयत्न

      तालुक्यातील कानडी माळी येथील इंदुबाई लालासाहेब कुचेकर (५०) ह्या महिलेचे पती लालासाहेब हरिभाऊ कुचेकर पोलीस दलात नौकरीस होते. मात्र २००५ मध्ये ते परळी येथे कर्तव्यावर असताना अचानक गायब झाले. दरम्यान त्यांचा शोध घेण्याचा प्रयत्न झाला मात्र २०१३ पर्यंत शोध न लागल्याने त्यांना मयत घोषित करण्यात आले. त्यामुळे मागच्या पंधरा वर्षांपासून सदरील महिला कानडी माळी येथे माहेरी राहून उपजीविका भागवत आहे. दरम्यान पतीच्या नौकरीचे कालावधीचे पि.एफ तेरा लाख चौ-याएंशी हजार रूपये सन २०१८ च्या ऑगस्ट महिण्या मध्ये सदरील महिलेला मिळाले. त्यापैकी नऊलाख चौऱ्यांशी हजार रूपये तिने तिचे बीड येथे राहत असलेली दोन्ही मुले संतोष व नितीनला बोलावुन दिले. परंतु त्यानंतरही त्यांनी आम्हांला आणखी पैसे दे म्हणुन सन २०१८ पासुन घरी येवुन सतत शिवीगाळ व हाणमार  करत होते. त्याचप्रमाणे दिनांक ३ ऑक्टोबर २०२० रोजी दुपारी एक वाजण्याचे सुमारास संतोष व नितीन कानडीमाळी येथे आले व पैसे देण्याच इंतजाम कर म्हणत आईला जीवे मारण्याची धमकी दिली. त्यावेळी सदरील महिलेने गावातील माणसे गोळा करून तुम्हाला पैसे देवुन टाकते असे म्हटल्यावर दोघेही निघुन गेले. त्यानंतर सायंकाळी सात वाजण्याचे सुमारास महिला घरी असताना संतोष व नितीन घरी

आले व राहिलेले पि.एफ चे पैसे मागु लागले. तेव्हा माझ्याकडे आता पैसे नाहीत असे महिलेने सांगितले. त्यावेळी संतोषच्या हातामध्ये असलेली पेट्रोलची बॉटल हिच्या अंगावर टाक व असे नितीन म्हणाला असता सदरील महिला घाबरून पळाली. मात्र संतोष व नितीन हे दोघेही पाठीमागे पळाले व संतोष याने त्याचे हातातील बॉटलमधील पेट्रोल आईच्या अंगावर टाकले.तर दुसरा मुलगा नितीन याने जिवे मारण्याच्या उद्देशाने काडी पेटीतील काडी पेटवुन आईच्या अंगावर फेकली. मात्र तेवढ्यात गावचे सरपंच अमर सोपान राऊत यांनी नितीनच्या हातावर मारून पेटलेली काडी विझवली व त्याच्या हातातील काडीपेटी हिसकावुन फेकुन दिली. तर रोडवर असलेले शिवाजी रधुनाथ राऊत, विशाल रामकिसन पारवे, शहाजी खाडे, कान्हु पंढरी खाडे यांनी दोन्ही मुलांना पकडले व महिलेचा भाऊ कान्हु पंढरी खाडे यांनी धरून बाजुला नेऊन बसवले म्हणून अनर्थ टळला.

            सदरील प्रकरणी आईच्या फिर्यादीवरून नितीन लालासाहेब कुचेकर व संतोष लालासाहेब कुचेकर या दोन्ही मुलांवर केज पोलिसात गुन्हा दाखल झाला असून पोलिसांनी दोघांनाही अटक करून कोर्टासमोर हजर केले असता दोघांनाही सहा तारखेपर्यंत पोलीस कस्टडीत ठेवण्याचे आदेश देण्यात आले आहेत. पुढील तपास पोलीस निरीक्षक प्रदीप त्रिभुवन यांच्या मार्गदर्शनाखाली फौजदार दादासाहेब सिद्धे हे करत आहेत.