अल्पवयीन मुलीवर प्राणघातक हल्ला करणाऱ्या रोडरोमिओला दहा वर्षांची सक्तमजुरी…..!

                चार वर्षापूर्वी परळी शहरात ही भयावह घटना घडली होती. सतीश वसंत मंत्रे असे त्या रोडरोमिओचे नाव आहे. आठवीच्या वर्गात शिक्षण घेणारी अल्पवयीन मुलगी शाळेत जाण्यासाठी निघाली असता वाटेत सतीशने तिची छेड काढून जीवे मारण्याची धमकी दिली होती. घाबरलेल्या पिडीतेने झालेली घटना पालकांना सांगितली. त्यानंतर पालकांनी सतीशच्या घरी जाऊन त्याला समजावून सांगितले होते. त्यामुईल संतापलेल्या सतीशने पीडिता सकाळच्या वेळी शाळेत जात असताना तिला वाटेत अडवले. यापूर्वीची घटना तू घरी का सांगितलीस असे म्हणत तिला शिवीगाळ करत सोबत आणलेल्या चाकूने तिच्या पोटावर वार करून तिला गंभीर जखमी केले. त्यानंतर रोडवर पडलेल्या पिडीतेच्या डोक्यात मारण्यासाठी त्याने मोठा दगड उचलला. परंतु, सतीश दगड मारणार तेवढ्यात तिथे जमा झालेल्या लोकांनी त्याला पकडल्याने पिडीतेचा जीव वाचला. नागरिकांनी पिडीतेला तातडीने रुग्णालयात पाठविल्याने तिच्यावर वेळेत उपचार होऊ शकले. याप्रकरणी सतीश मंत्रे याच्यावर परळी शहर पोलीस ठाण्यात पोक्सोसह विनयभंग आणि प्राणघातक हल्ल्याचा गुन्हा नोंद करण्यात आला. पोलीस निरिक्षक डी.बी. काळे यांनी तपास पूर्ण करून दोषारोपपत्र न्यालयात सादर केले.

                  या खटल्याची सुनावणी अंबाजोगाई जिल्हा व सत्र न्या. सापटनेकर यांच्या न्यायालयासमोर झाली. दोन्ही बाजूंची युक्तिवाद ऐकल्यानंतर न्यायालयाने सतीश मंत्रे यास दोषी ठरवून त्याला दहा वर्षे सक्तमजुरी आणि ३० हजार रुपये दंडाची शिक्षा ठोठावली. दंडाच्या रकमेतील २५ हजार रुपये पिडीतेस नुकसानभरपाई म्हणून देण्यात येणार आहेत. सदर प्रकरणात सरकार पक्षातर्फे अशोक कुलकर्णी यांनी काम पहिले. त्यांना ॲड. डी.डी. लांब आणि ॲड. एन.एस. पुजदेकर व पैरवी चौधर यांनी सहकार्य केले.

सदरील हल्ला सतीश मंत्रे याने वेडाच्या भरात केल्याचा बचाव सुनावणी दरम्यान करण्यात आला. परंतु, सतीशला बारावीला चांगले गुण मिळाले आहेत, तो नोकरी करतो, तसेच सोबत दोन मुली असताना त्याने फक्त पिडीतेवरच हल्ला केल्या. त्यावरून हे कृत्य त्याने जाणूनबुजून केले असल्याचे सरकारी पक्षाने न्यायालयाच्या निदर्शनास आणून दिले. त्याआधारे न्यायालयाने सतीशचा बचाव फेटाळला आणि त्याला दोषी ठरवले.