बीड दि.१० – २८ फेब्रुवारी रोजी झालेल्या राज्यातील आरोग्य विभागाच्या परीक्षांमध्ये उघड फसवणूक व गैरप्रकार झाल्याच्या घटना निदर्शनास आल्या असून आरोग्य विभागातील ८५०० पदांसाठी ही परीक्षा राज्यात जिल्हा व तालुका केंद्रांवर दोन सत्रांत ऑफलाइन घेण्यात आली. परीक्षेला अंदाजे साडेतीन लाख उमेदवारांनी हजेरी लावली होती. शासकीय आरोग्य विभागासाठी रविवारी २८ फेब्रुवारी रोजी भरती परीक्षा घेत असलेल्या खासगी संस्थांमधील गैरकारभार, भ्रष्टाचार आणि निष्काळजीपणा पुन्हा एकदा उघडकीस आले आहेत.
राज्यात बहुतांश परीक्षा केंद्रांवर गोंधळ उडाला होता. या निष्काळजीपणामुळे भरती प्रक्रियेच्या पारदर्शकतेबाबत प्रश्न निर्माण होत आहेत. यामुळे आरोग्य विभागाच्या परीक्षां पुन्हा घेण्यात याव्या व पद भरती एमपीएससी द्वारे करण्यात यावी अशी मागणी एसएफआय व डीवायएफआयच्या वतीने करण्यात येत आहे.
अहमदनगर येथील परीक्षा केंद्रातील एका खोलीत एका बाकावर एकत्र किमान आठ ते दहा परीक्षार्थी बसलेले सोशल मीडियावर प्रसारित झालेल्या छायाचित्रांमधून दिसून येत आहेत. मागील बाकावर देखील तीच अवस्था फोटो दर्शविते. आणखी एक धक्कादायक चित्र म्हणजे उमेदवारांनी जमिनीवर बसून परीक्षा दिली. सकाळी दहा वाजता दापोली येथील परीक्षा केंद्रावर आलेल्या उमेदवारांना ते केंद्र बंद आढळले. परीक्षा सुरू होण्यास उशीर झाल्याच्या अशा तक्रारी विविध केंद्रांमधून समोर आल्या आहेत. विविध केंद्रांवर पोलिस बंदोबस्त नव्हता याचीही गंभीरपणे नोंद घेतली जात आहे. औरंगाबादमधील काही केंद्रांमध्ये प्रश्नपत्रिका उशिरा आल्याचा आरोप आहे, तर काही केंद्रांमध्ये सर्व उमेदवारांना सामावून घेण्याची पुरेशी व्यवस्था नसल्याने उमेदवारांकडून आंदोलन केल्या गेल्यामुळे पोलिसांना पाचारण करावे लागले. केवळ १००० उमेदवारांसाठी व्यवस्था केली गेली होती परंतु २००० हून अधिक उमेदवार केंद्रावर पोहोचले. यादरम्यान पोलिसांनी चिटिंग करणाऱ्या चार जणांना अटक केली ज्यात २ जण परीक्षा केंद्रातून आणि २ जण जवळील अभ्यास केंद्रातील आहेत.. मायक्रोफोन व स्कॅनरसह उमेदवार परीक्षेच्या ठिकाणी आले होते. अशा फसवेगिरीसाठी दहा ते पंधरा लाख रुपये दिले जात आहेत असा आरोप परीक्षार्थी उमेदवारांनी केला आहे.
औरंगाबाद पोलिसांना जे सापडले ते म्हणजे हिमखंडाचा फक्त एक कण. पूर्वीच्या परीक्षांमध्येही महाराष्ट्रातील सर्व जिल्ह्यांतील विविध केंद्रांवर गैरप्रकार आणि सामूहिक फसवणूकीची अनेक प्रकरणे नोंदवली गेली आहेत. महाराष्ट्र सरकारतर्फे घेण्यात आलेल्या भरतीसाठी नोडल एजन्सी म्हणून महाराष्ट्र माहिती तंत्रज्ञान महामंडळ लिमिटेड किंवा ‘महाआयटी’ अयशस्वी होण्याची ही पहिली वेळ नाही. या परीक्षा सामान्य प्रशासन विभाग (जीएडी) द्वारे प्रशासित प्रशासकीय सेवेचा एक भाग आहेत. महाआयटी आणि जीएडी या दोघांनीही ही जबाबदारी टाळली आहे. जीएडी आणि महाआयटी एकमेकांना दोष देत आहेत.
अनेक घोटाळे करूनही खासगी कंपन्या अजूनही भरती परीक्षा घेत आहेत ही अत्यंत चिंतेची बाब आहे. मे २०२० मध्ये अहमदनगरचे जिल्हाधिकारी राहुल द्विवेदी यांनी १२ जिल्ह्यांच्या परीक्षांमध्ये विसंगती असल्याचा अहवाल दिला होता. आणि अहमदनगर जिल्ह्यात किमान शॉर्टलिस्ट केलेले १७ उमेदवार संशयित असल्याचे आढळले. २०१७ नंतर आरोग्य विभागात भरतीसाठी घेण्यात आलेली ही परीक्षा पहिलीच आहे. एकीकडे बेरोजगारी साथीच्या आजाराप्रमाणे पसरत आहे. तरीही कायमस्वरूपी फारच कमी पदे सरकारकडून भरली जात आहेत. तेही अशा गुन्हेगारी निष्काळजीपणा आणि गैरप्रकारासह. हे कुठतरी थांबले पाहिजे यासाठी आज वडवणी तहसील कार्यालय येथे गैरप्रकार झालेल्या आरोग्य विभागाची भरती परीक्षा रद्द करून, एमपीएससी मार्फत त्वरित पुन्हा परीक्षा घ्या. या मागणीला घेऊन मा.आरोग्यमंत्र्यांना वडवणी तहसिलदार यांच्यामार्फत निवेदनाद्वारे डीवायएफआय व एसएफआयच्या वतीने मागणी करण्यात आली. यावेळी लहू खारगे, शंकर टिपरे, बालाजी हेंद्रे, ऋषिकेश कलेढोण, ज्योतीराम कलेढोण, किरण कुरकुटे, सोपान ढवळशंख,विजय टकले व विद्यार्थी, युवक उपस्थित होते.
