केज दि.17 – केज कळंब रोडवरील साळेगांव बस स्टँडवर मोटार सायकल आणि मोपेडच्या झालेल्या अपघातात एकजण गंभीर जखमी झाला आहे.
तालुक्यातील साळेगांव येथे बस स्टॅंडवर दि. १७ ऑगस्ट बुधवार रोजी दुपारी १२.३० वा. च्या दरम्यान ज्ञानोबा अनंतराव इंगळे यांच्या मोपेड क्र. (एम एच-४४/ एक्स-१४७२) ला कळंब कडून येणाऱ्या मुदसिरोद्दीन मेहरोद्दीन काजी रा. उस्मानाबाद यांच्या एफ झेड या मोटार सायकल क्र. (एम एच-२५/एस-७१४१) जोराचे धडक दिली. यात ज्ञानोबा इंगळे हे गंभीर जखमी झाले आहेत. त्यांना केज येथील उपजिल्हा रुग्णालयात प्रथमोपचार करून पुढील संदर्भीय सेवेसाठी अंबाजोगाई येथील स्वामी रामानंद तीर्थ ग्रामीण रुग्णालय व वैद्यकीय महाविद्यालयात हलविले आहे.
सदरील घटनेची माहिती मिळताच केज पोलीस ठाण्याचे सहाय्यक पोलीस निरीक्षक शंकर वाघमोडे यांच्या मार्गदर्शनाखाली पोलीस जमादार राजू गुंजाळ आणि हनुमंत गायकवाड हे सरकारी वाहनाने घटनास्थळी हजर झाले.
दरम्यान, एक महिन्यात याच ठिकाणी चार अपघात झाले असून या हायवेला एक राज्य रस्ता क्रॉस करीत आहे. तसेच रस्त्यावर उभ्या असलेल्या खाजगी वाहने आणि रिक्षा यामुळे समोरून येणारे वाहन दिसत नाही. भरधाव वेगाने वाहने वाहत असल्याने गर्दीच्या ठिकाणी गतीरोधक उभारण्याची मागणी होत आहे.
