नांदेड दि.१४ – लेकीच्या नावावर घर करण्याचा आदर्श लोहा तालुक्यातील चिंचोली गावाने घालून दिला आहे. गावातील प्रत्येक घर हे महिलेच्या नावाने ओळखल्या जात असून घरांना लेकीचं नाव दिलं आहे. चिंचोली गावचे सरपंच गोविंद जाधव यांनी हा उपक्रम राबवला असून त्यास गावकऱ्यांनी उत्स्फूर्तपणे प्रतिसाद दिला. माझं गांव सुंदर गाव हे अभियान राबवत या गावाने आता कात टाकली असून चिंचोली गांव हे नांदेड जिल्ह्यात कौतुकाचा विषय बनलं आहे.
निर्णयप्रक्रियेत महिलांचा सहभाग वाढावा म्हणून शासन स्तरावर नेहमीच प्रयत्नांची शिकस्त केली जाते. अगदी घर घेताना ते घर जर महिलांच्या नावे घेतलं तर घराच्या किमतीच्या रकमेत सूटही दिली जाते.
दरम्यान नांदेडच्या चिंचोली गावात महिला मुलींच्या नावे घरं करुन त्यांना एकप्रकारे सन्मान देण्याचा आदर्श निर्णय गावकऱ्यांनी घेतला आहे. चिचोंली ग्रामस्थाचं आणि सरपंचाचं जिल्ह्यात या निर्णयाने कौतुक होतं आहे.
