केज दि. २६ – तालुक्यातील माळेगाव येथे ग्रामदैवत श्री तुळजाभवानी मातेची कोजागिरी पौर्णिमेनिमित्त यात्रा रविवारी (दि. २५) उत्साहात पार पडली. यात्रेनिमित्त पहाटे देवीचा अभिषेक व अलंकार महापूजा करण्यात आली. दर्शनासाठी पंचक्रोशीतून हजारो भाविकांनी गर्दी केली होती.
यात्रेतील मुख्य आकर्षण म्हणजे, सलग पाच दिवस निरंकार उपवास करणारे भक्त प्रकाश (बापू) गव्हाणे यांनी नागरिकांनी भरलेल्या आणि एकमेकांना दोरखंडाने बांधलेल्या तब्बल १३ बैलगाड्या ओढल्या. ‘आई राजा उदो उदो’च्या गजरात पार पडलेला हा थरारक सोहळा पाहण्यासाठी मोठी गर्दी झाली होती.
याशिवाय रात्री ढोल-ताशांच्या गजरात व फटाक्यांच्या आतषबाजीत देवीची पालखी मिरवणूक काढण्यात आली. भाविकांना मसाला दुधाचे वाटप करण्यात आले, तसेच माजी सैनिक ब्लड बँक, बीड यांच्या वतीने रक्तदान शिबिर घेण्यात आले. आकर्षक विद्युत रोषणाई, खाद्यपदार्थांचे स्टॉल आणि विविध मनोरंजनाच्या साधनांमुळे यात्रा आनंदात पार पडली.
