केज दि.१४ – दारू नेहमी का पितात असे म्हणत मुलाने दारूच्या नशेत पित्याच्या पायाच्या नडगीवर मारहाण केली होती. रक्तस्त्राव होऊन पित्याचा मृत्यू झाल्याची घटना युसुफवडगाव ( ता. केज ) येथे घडली. याप्रकरणी मुलाविरुद्ध कलम ३०४ भादविनुसार गुन्हा दाखल झाला असून पोलिसांनी मुलास ताब्यात घेतले आहे.
युसुफवडगाव येथील मल्हारी निवृत्ती लगसकर याने दारूच्या नशेत १२ जून रोजी मध्यरात्री येऊन वडील निवृत्ती कोंडीबा लगसकर ( वय ६५ ) यांना नेहमी दारू का पितात असे म्हणत त्यांच्या पायाच्या नडगीवर कशाने तरी मारहाण केली होती. पायावर जखम झाल्याने रक्तस्त्राव होऊन रात्रीतून त्यांचा घरीच मृत्यू झाला. युसुफवडगाव येथील प्राथमिक आरोग्य केंद्रात शवविच्छेदन करण्यात आले आहे. तर त्यांच्या मृत्यूस त्यांचा मुलगा मल्हारी लगसकर हा कारणीभूत असल्याची फिर्याद त्यांचा दुसरा मुलगा पोपट निवृत्ती लगसकर यांनी दिल्यावरून मल्हारी निवृत्ती लगसकर याच्याविरुद्ध युसुफवडगाव पोलिसात कलम ३०४ भादविनुसार गुन्हा दाखल झाला असून पोलिसांनी मल्हारी लगसकर यास ताब्यात घेतले आहे. सहाय्यक पोलीस निरीक्षक संदीप दहिफळे यांच्या मार्गदर्शनाखाली फौजदार रियाजोद्दीन शेख हे पुढील तपास करीत आहेत.
