बीड दि.३ – दिवाळी सुट्टी बाबत विद्यार्थी आणि शिक्षकांमध्ये मागच्या काही दिवसांपासून संभ्रम निर्माण झालेला होता. नेमकी सुट्टी सहा नोव्हेंबर पासून की नऊ नोव्हेंबर पासून हा प्रश्न समोर होता. मात्र यावर आता पडदा पडला असून बीडचे शिक्षणाधिकारी यांनी अधिकृत पत्र काढून बीड जिल्ह्यासाठी दिवाळीच्या सुट्ट्या जाहीर केल्या आहेत.
दिनांक दहा ऑक्टोबर रोजी दिवाळीच्या सुट्टीबाबत शिक्षणाधिकारी यांनी दिवाळी सुट्ट्या बाबत एक पत्र जारी केले होते. त्यामध्ये दिवाळीच्या सुट्ट्या दिनांक सहा नोव्हेंबर ते 25 नोव्हेंबर राहतील असे सूचित केले होते. मात्र दिवाळीच्या सुट्ट्या ह्या नऊ नोव्हेंबर पासून लागणार अशा प्रकारची चर्चा सुरू होती. आणि त्याबाबत राज्यात एक सूत्रता यावी यासाठी फेरविचार होण्याची शक्यता होती. आणि त्याच अनुषंगाने दिनांक 3 नोव्हेंबर रोजी बीडचे शिक्षणाधिकारी (माध्य/प्राथमिक) यांनी दिवाळी सुट्ट्यांबाबत एक सुधारित पत्र काढले असून यामध्ये दिवाळीच्या सुट्ट्या दिनांक नऊ नोव्हेंबर ते 25 नोव्हेंबर पर्यंत जाहीर करण्यात आल्या आहेत.
दरम्यान, 26 नोव्हेंबर रोजी रविवार आणि 27 नोव्हेंबर रोजी गुरुनानक जयंती असल्याने शाळा ह्या 28 नोव्हेंबर रोजी सुरू होतील. शिक्षणाधिकारी यांनी काढलेल्या पत्रामुळे अधिकृत सुट्ट्यांचा कालावधी हा जाहीर झाल्याने विद्यार्थी व शिक्षकांमधील संभ्रम दूर झाला आहे.
