अंबाजोगाई दि. ३ – सध्या संपूर्ण महाराष्ट्रात पावसाने ओढ दिल्याने तीव्र दुष्काळाची परिस्थिती निर्माण झाली आहे. याचा फटका घाटनांदूर महसूल मंडळालाही बसला असून, येथेही गंभीर दुष्काळाच्या झळा बसत आहेत. वेळेवर पाऊस न पडल्यामुळे आणि पावसाच्या दीर्घ खंडामुळे शेतातील उभी पिके पूर्णपणे करपून गेली आहेत. यामुळे परिसरातील शेतकरी आर्थिक संकटात सापडले असून त्यांच्यासमोर मोठे संकट उभे ठाकले आहे.
या गंभीर परिस्थितीची तातडीने दखल घेत शासनाच्या निर्देशानुसार घाटनांदूर महसूल मंडळातील बाधित पिकांची प्रत्यक्ष पाहणी करून नुकसानीचे पंचनामे सुरू करण्यात आले आहेत. महसूल आणि कृषी विभागाच्या अधिकाऱ्यांनी प्रत्यक्ष शिवारामध्ये जाऊन पिकांच्या नुकसानीची अचूक नोंद घेण्यास सुरुवात केली आहे. पाहणी दौऱ्यादरम्यान कृषी सहाय्यक श्रीमती दिपाली मुंडे, तलाठी विठ्ठल पंडित, सरपंच महेश गारठे, तंटामुक्ती अध्यक्ष मुख्तार शेख, ग्रामपंचायत सदस्य शिवाजी चव्हाण, वसंत कदम तसेच पत्रकार संजय रानभरे, गणेश जाधव आणि उदय जाधव आदी मान्यवर व ग्रामस्थ मोठ्या संख्येने उपस्थित होते.
दरम्यान, शेतकऱ्यांचे झालेले नुकसान पाहता, हे पंचनामे लवकरात लवकर पूर्ण करून बाधित शेतकऱ्यांना शासनाकडून त्वरित आर्थिक मदत आणि योग्य ती भरपाई मिळवून द्यावी, अशी आग्रही मागणी आता घाटनांदूर परिसरातील स्थानिक शेतकरी व ग्रामस्थांकडून केली जात आहे.
