पत्नीस जीवे मारण्याचा प्रयत्न केल्याप्रकरणी पतीस 2 वर्ष सक्त कारावास व 500 रूपये दंड, बीड येथील अपर सत्र न्यायालय 1 चा निकाल

         याबाबत थोडक्यात हकीकत अशी की, दिनांक 11/06/2015 रोजी उंबरमुळी ता.शिरूर येथे फिर्यादी वैशाली विकास खेडकर हिचा घाटशिळ पारगाव ता.शिरूर येथील विकास बाबासाहेब खेडकर यासोबत रितीरिवाजाप्रमाणे विवाह झाला होता, परंतु लग्नानंतर सहा महिन्याने विकास व त्याचे आई वडीलांनी फिर्यादीस माहेरून चारचाकी गाडी घेण्यासाठी तीन लाख रूपये का देत नाही म्हणून दिनांक 20/04/2017 रोजी सकाळी 10.30 वाजेच्या सुमारास राहत्या घरी आरोपी विकास व त्याचे आई वडील यांनी मिळून फिर्यादीस लाथा बुक्कयाने मारहाण व शिवीगाळ करून तिच्यावर रॉकेल ओतून जिवे मारण्याचा प्रयत्न केला. सदरच्या फिर्यादीने दिलेल्या जबाबावरून पोलीस ठाणे शिरूर येथे  गुन्हा नोंद होवून गुन्ह्याचा तपास पोउनि एम.आर. काझी यांनी केला. तपासीक अधिकारी यांनी आरोपीताविरूध्द सबळ पुरावे गोळा करून गुन्ह्याच्या तपासांती मुदतीत अंतीम दोषारोपपत्र मा. न्यायालयास सादर केले होते.

         सदर प्रकरणातील सुनावणी बीड येथील मा.अपर सत्र न्यायालय 1 ले यु. टी.पौळ यांच्या न्यायालयात झाली. सुनावणीअंती न्यायालयाने कलम 498 (अ) भादंवि मध्ये दोषी ठरवून 2 वर्ष सक्त कारावास व प्रत्येकी 500/- रूपये दंड अशी शिक्षा सुनावण्यात आली. प्रकरणात सरकारी पक्षाची बाजु जिल्हा सरकारी वकील श्रीमती एम.एम.दराडे यांनी मांडली व सरकार पक्षाची बाजू मजबूत करण्यासाठी एस. आर. डोंगरे यांनी पैरवीचे कामकाज पाहिले.