शालेय पोषण आहार योजनेअंतर्गत उन्हाळी सुट्टीच्या कालावधीतील लाभ थेट विद्यार्थ्यांच्या बँक खात्यात जमा होणार……! 

                   केंद्र शासनाच्या उपरोक्त नियोजनाप्रमाणे योजनेस पात्र सर्व लाभार्थ्यांच्या बँक खात्यामध्ये उन्हाळी सुट्टीच्या कालावधीतील आहार खर्चाची रक्कम थेट लाभार्थी विद्यार्थ्यांचे बँक खात्यामध्ये हस्तांतरण करण्याचा निर्णय शासनाने घेतला आहे. शासन निर्देशानुसार जिल्ह्यातील शालेय पोषण आहार योजनेस पात्र सर्व लाभार्थ्यांचे आधार लिंक बँक खाते माहिती विहित नमुन्यात अद्ययावत करुन तयार ठेवण्यात यावी. तसेच अद्याप ज्या विद्यार्थ्याचे बँक खाते उघडण्यात आले नसेल, अशा विद्यार्थ्यांचे आधार लिंक बैंक खाते उघडण्याबाबत संबंधिताना आपल्यास्तरावरुन लेखी सूचना निर्गमित करण्यात याव्यात. तसेच जिल्ह्यातील शापोआ योजनेस पात्र असलेल्या सर्व लाभार्थ्यांचे १००% बँक खाते उघडण्यात यावेत.

           दरम्यान दिनांक ०९जुलै, २०२१ पर्यंत बँक खात्याची सर्व माहिती अद्ययावत करून जिल्हास्तरावर जतन करण्यात यावी जेणेकरुन शासनस्तरावरुन पुढील निर्देश प्राप्त होताच उचित कार्यवाही करण्याकरीता सदर माहिती उपलब्ध करुन देणे शक्य होईल. बॅक खाते उघडण्याकरीता शाळेने संबंधित पालकांना आवश्यक ती मदत करण्याचे निर्देश आपल्या स्तरावरुन सर्व शाळांना निर्गमित करण्यात यावेत असे आदेश निर्गमित करण्यात आले आहेत.