बीड दि. ४ – शहर आणि परिसरात अवैध हत्यारांची तस्करी व हालचाली रोखण्यासाठी स्थानिक गुन्हे शाखेने (LCB) धडक कारवाई करत एका ट्रक चालकाला रंगेहाथ पकडले आहे. त्याच्या ताब्यातून ५४ हजार रुपये किमतीचा एक गावठी कट्टा (पिस्टल) आणि चार जिवंत काडतुसे जप्त करण्यात आली आहेत.
बीड येथील जालना रोडवरील रिलायन्स मॉलजवळ एक इसम कमरेला गावठी कट्टा लावून संशयास्पद रितीने फिरत असल्याची गुप्त बातमीदाराकडून स्थानिक गुन्हे शाखेला खात्रीशीर माहिती मिळाली होती. या माहितीच्या आधारे पोलीस निरीक्षक शिवाजी बंटेवाड यांच्या मार्गदर्शनाखाली पथकाने तातडीने घटनास्थळी धाव घेत छापा टाकला. यावेळी सत्यम अशोक कासार (वय २३, रा. अस्तीगाव, ता. पारनेर, जि. अहिल्यानगर) याला ताब्यात घेण्यात आले.त्याची झडती घेतली असता, त्याच्याकडे अवैध गावठी कट्टा आणि चार जिवंत काडतुसे आढळून आली. पोलिसांनी सर्व मुद्देमाल जप्त केला असून, आरोपीविरुद्ध शिवाजीनगर पोलीस ठाण्यात गुन्हा दाखल करण्यात आला आहे. या प्रकरणाचा पुढील तपास शिवाजीनगर पोलीस करत आहेत.
सदरील कारवाई पोलीस अधीक्षक नवनीत काँवत, अपर पोलीस अधीक्षक समीर शेख आणि उपविभागीय पोलीस अधिकारी व्यंकटराम यांच्या मार्गदर्शनाखाली सपोनि धनराज जारवाल, दीपक खांडेकर, गोविंद राख, आनंद मस्के, भागवत शेलार, गणेश हांगे व सारणीकर यांच्या पथकाने पार पाडली.
