केज दि. २९ -शिवसेनेच्या (शिंदे गट) केज तालुका अल्पसंख्याक विभागाच्या प्रमुखपदी ज्येष्ठ पत्रकार सय्यद माजेद यांची नियुक्ती करण्यात आली आहे. अल्पसंख्याक विभागाचे जिल्हाप्रमुख ॲड. लालाखान पठाण यांनी नुकतेच त्यांना अधिकृत नियुक्ती पत्र प्रदान केले. या निवडीनंतर सय्यद माजेद यांच्यावर अभिनंदनाचा वर्षाव होत आहे.
पक्षाच्या वरिष्ठांच्या मार्गदर्शनाखाली जबाबदारी
हिंदुहृदयसम्राट स्व. बाळासाहेब ठाकरे आणि धर्मवीर आनंद दिघे यांच्या विचारांचा वसा जोपासत, राज्याचे उपमुख्यमंत्री एकनाथ शिंदे, युवासेना प्रमुख खासदार श्रीकांत शिंदे आणि अल्पसंख्याक विभागाचे प्रदेशाध्यक्ष आमदार सईद खान यांच्या आदेशानुसार ही महत्त्वाची जबाबदारी सय्यद माजेद यांच्यावर सोपवण्यात आली आहे.
पक्षवाढीसाठी कार्यकर्त्यांना मार्गदर्शन
नियुक्ती पत्र देताना जिल्हाप्रमुख ॲड. लालाखान पठाण यांनी सय्यद माजेद यांना भावी वाटचालीस शुभेच्छा दिल्या. यावेळी बोलताना पठाण म्हणाले की, “सय्यद माजेद यांनी शिवसेनेचे विचार तळागाळातील लोकांपर्यंत आणि सर्वसामान्य नागरिकांपर्यंत पोहोचवावेत. तसेच, केवळ अल्पसंख्याकच नव्हे तर सर्व समाजातील लोकांच्या समस्या सोडवण्यासाठी पुढाकार घेऊन त्यांना न्याय मिळवून द्यावा आणि पक्ष संघटना अधिक मजबूत करावी.”
आपल्या निवडीबद्दल बोलताना सय्यद माजेद यांनी पक्षाच्या वरिष्ठ नेत्यांचे आभार मानले असून, पक्ष नेतृत्वाने दाखवलेला विश्वास सार्थ ठरवून पक्षवाढीसाठी प्रामाणिकपणे काम करणार असल्याचे सांगितले. त्यांच्या निवडीमुळे केज तालुक्यातील राजकीय वर्तुळातून त्यांचे अभिनंदन करण्यात येत आहे.
