केज दि. १८ – ग्रामीण भागातील मुली शिक्षणापासून वंचित राहू नयेत आणि त्यांचा शैक्षणिक प्रवास सुखकर व्हावा, या उद्देशाने डॉ. प्रतिभा अशोक थोरात यांनी घेतलेल्या पुढाकारामुळे वाड्या-वस्त्यांवरून शाळेत ये-जा करणाऱ्या विद्यार्थिनींची मोठी अडचण दूर झाली आहे. केज विधानसभा मतदारसंघाच्या माजी आमदार तथा शिवसेना उपनेत्या मा. संगीताताई ठोंबरे यांच्या वाढदिवसाचे औचित्य साधून या विशेष सामाजिक उपक्रमाचे आयोजन करण्यात आले होते.
गावांच्या दौऱ्यातून समोर आली मुलींची अडचण केज विधानसभा मतदारसंघात डॉ. प्रतिभा अशोक थोरात व मा. संगीताताई ठोंबरे यांचा गावभेट आणि आशीर्वाद दौरा सुरू असताना अनेक वाड्या-वस्त्यांवरून मुली मैलोन्मैल पायी प्रवास करून शाळेत जात असल्याचे निदर्शनास आले. डॉ. प्रतिभाताईंनी या विद्यार्थिनींशी थेट संवाद साधला असता, वाहतुकीच्या साधनांअभावी शिक्षणात येणाऱ्या अडचणी समोर आल्या.
सामाजिक संस्थांचे योगदान मुलींची ही पायपीट थांबवण्यासाठी आणि विद्यार्थ्यांना आवश्यक शैक्षणिक साहित्य मिळावे यासाठी डॉ. प्रतिभाताई थोरात यांनी ‘श्री गणेश मेडिकल एजन्सी’ तसेच ‘मातोश्री बहुउद्देशीय सेवाभावी संस्था, यशवंतवाडी’ यांच्याकडे सायकली व दप्तरांसाठी पाठपुरावा केला. सामाजिक कार्यात सदैव अग्रेसर असलेल्या या दोन्ही संस्थांनी तात्काळ सकारात्मक प्रतिसाद देत मदतीचा हात पुढे केला.
सायकल व दप्तर वाटपाचा तपशील मा. संगीताताई ठोंबरे यांच्या वाढदिवसानिमित्त डॉ. प्रतिभाताई थोरात यांच्या शुभहस्ते गरजू विद्यार्थिनी व विद्यार्थ्यांना साहित्याचे वाटप करण्यात आले:
- ६५ सायकलींचे वाटप (८ गावे): नाव्होली, मस्सासजोग, काळेगाव, येवता, वाघेबाभूळगाव, भाटुंबा, आवसगाव आणि डिघोळअंबा.
- ५०० दप्तरांचे वाटप (९ गावे/शहरे): कानडी (ब), पळसखेडा, दिपेवडगाव, केकतसारणी, कळमअंबा, जवळबन, पिसेगाव, केज शहर आणि अंबाजोगाई शहर.
पालक व ग्रामस्थांकडून कौतुक वेळेवर सायकल मिळाल्याने मुलींचा शाळेत जाण्याचा वेळ व श्रम वाचणार असून त्यांचा शिक्षणाचा मार्ग सुकर झाला आहे. तसेच नवीन दप्तर मिळाल्याने विद्यार्थ्यांच्या चेहऱ्यावर आनंदाचे वातावरण पाहावयास मिळाले. ‘मुलगी शिकली, प्रगती झाली’ या विचाराला प्रत्यक्ष कृतीत उतरवणाऱ्या या कौतुकास्पद उपक्रमाबद्दल परिसरातील पालक, मुख्याध्यापक, शिक्षक आणि ग्रामस्थांनी डॉ. प्रतिभाताई थोरात व आयोजकांचे मनःपूर्वक आभार मानले आहेत.
